Opin námsgögn

Íslensk útgáfa af alþjóðlegu merki

Opin námsgögn (OER) eru stafræn gögn sem kennarar, nemendur og fólk í sjálfsnámi getur nálgast ókeypis og í opnum aðgangi til að nota og endurnýta í kennslu, við nám og rannsóknir. Ekki má rugla saman opnum námsgögnum við opinn hugbúnað sem byggir á ókeypis dreifingu og samvinnu við hugbúnaðargerð.

MIT háskólinn í Bandaríkjunum var meðal þeirra fyrstu sem ákvað árið 2001 að birta námsefni fjölmargra áfanga, jafnt myndbandsupptökur úr fyrirlestrum sem og verkefni, lausnir og próf. Í kjölfarið hafa fjölmargir háskólar fylgt fordæmi MIT og nú má finna fjöldan allan af vönduðu efni sem hægt er að nálgast endurgjaldslaust. Árið 2007 var sett fram svokölluð Cape Town-yfirlýsing sem hvetur skólafólk um allan heim til að setja kennsluefni á netið endurgjaldslaust. Annar vettvangur þar sem hægt er að nálgast og deila opnum námsgögnum er vefur samtakanna OER commons en þar er að finna mikið magn af opnu námsefni.