Myspace

Úr Wikipediu, frjálsa alfræðiritinu
Stökkva á: flakk, leita

MySpace er netsamfélag þar sem skráðir notendur mynda tengslanet gegnum vinahópa, persónulýsingar, blogg, myndir, tónlist og myndbönd. Hægt er að leita innan Myspace og hægt er að senda tölvupóst milli notenda. Myspace er samkvæmt mælingum hjá Alexa.com fjórða vinsælasta vefsetur í heimi, á eftir Yahoo!, MSN og Google. Meira en 100 milljón notendur voru skráðir á Myspace í ágúst 2006. Myspace hefur verið í eigu fjölmiðlasamsteypunnar News Corporation frá júlí 2005.

Myspace.com var skráð lén árið 1998 en netsamfélag eins og nú er rekið var stofnað í júlí 2003 af Tom Anderson, Chris DeWolfe og hópi forritara.

Persónulýsingar[breyta]

Persónulýsingar (profiles) á Myspace eru upplýsingar um notandann og áhugamál hans og hverja hann vill hitta. Notandi getur hlaðið inn myndum og valið eina þeirra sem einkennismynd fyrir sig. Notendur geta einnig hlaðið inn stuttum myndskeiðum sem hægt er að spila í Flash spilara. Notendur geta ráðið útliti á síðum sínum með því að nota HTML/XHTML kóða og CSS stílskjöl. Algengt er að notendur velji sér tilbúið snið og lími á síðurnar forritsbúta sem spila tónlist og/eða myndskeið. Einfalt er að bæta við persónulýsingar tónlist úr tónlistarkerfi Myspace.

Vinalistar[breyta]

Hægt er að sjá hve margir vinir eru skráðir og skoða yfirlit yfir alla vini. Vinir geta skráð inn skilaboð/athugasemdir sem allir geta lesið. Hægt er að senda út fréttabréf (bulletin) til allra á vinalista. Þessi fréttabréf eru eyðilögð eftir tíu daga. Notendur geta stofnað hópa sem hafa sameiginlega vefsíðu og skilaboðakerfi. Dæmi um slíkan hóp er http://groups.myspace.com/Iceland

Öryggi[breyta]

Dæmi eru um að með efni á Myspace hafi verið dreift njósnabúnaði(spyware). Upplýsingum sem notendur gefa á Myspace er iðulega safnað af aðilum sem reyna að selja notendum vörur eða þjónustu. Talið er að stærstur hluti notenda Myspace sé ungt fólk. Myspace er ætlað notendum frá 14 ára aldri og upplýsingar um aldur koma frá notendunum sjálfum. Algengt er að skólastofnanir í Bandaríkjunum leyfi ekki aðgang að Myspace og sérstök lög sem skylda skólastofnanir og bókasöfn sem njóta opinberra styrkja til að koma í veg fyrir að börn taki án eftirlits þátt í netsamfélögum eins og Myspace (DOPA - Deleting Online Predators Act of 2006) eru nú fyrir bandaríska þinginu.

Tónlist[breyta]

Tónlistarmenn og hljómsveitir sem höfða til ungs fólks nota í sívaxandi mæli Myspace til að ná til áheyrenda. Myspace lokaði um tíma fyrir aðgang að Youtube myndböndum.

Tenglar[breyta]

Einkennismerki Wikifrétta
Wikifréttir eru með grein sem tengist