Margaret Mead

Úr Wikipediu, frjálsa alfræðiritinu
Margaret Mead

Margaret Mead (f. 16. desember 1901, d. 1978) var bandarískur mannfræðingur. Hún var frumkvöðull í mannfræðilegum rannsóknum á barnæsku, uppeldisaðferðum og kynhlutverkum, og áhrifum þeirra á menningu og samfélag. Einnig var hún brautryðjandi í notkun ljósmynda og kvikmynda við gagnasöfnun á vettvangi.

Hún rannsakaði árið 1925 stúlkur og þroskaferil unglingsára á eyjunni Tau í Samóa eyjaklasanum. Hún taldi að kynþroski stúlkna á Samóaeyjum og yfirfærsla frá ungling yfir í fullorðna konu væri án átaka og tilfinningalegrar spennu. Árin 1928–1930 rannsakaði hún fjölskyldulíf og hugmyndir um kynlíf, hjónaband, barnauppeldi og yfirnáttúrlega hluti hjá Manus-fólkinu á Aðmírálseyjum undan ströndum Nýju-Gíneu. Hún lauk doktorsprófi frá Columbia-háskóla árið 1929.

Mead gerði rannsókn 1931 til 1933 er hún dvaldi hjá Tchambuli-, Arapesh- og Mundugumor-fólkinu á Nýju-Gíneu og skoðaði þá meðal annars kynhlutverk. Árið 1936 fór hún til þriggja ára dvalar á Balí með þáverandi eiginmanni og notuðu þau ljósmyndir og kvikmyndir við gagnasöfnun sem þá var nýlunda.

Mead var mjög vinsæll fræðimaður og álitsgjafi í fjölmiðlum. Hún var afkastamikil og á árunum 1925–1975 birtust eftir hana 1300 ritverk af ýmsu tagi.

Heimild[breyta | breyta frumkóða]

  • Helga Björnsdóttir. „Hver var Margaret Mead og hvert var hennar framlag til mannfræðinnar?“. Vísindavefurinn 26.4.2011. http://visindavefur.is/?id=59299. (Skoðað 27.4.2011).

Tenglar[breyta | breyta frumkóða]

„Hver var Margaret Mead og hvert var hennar framlag til mannfræðinnar?“. Vísindavefurinn.