Kristinn Ágúst Friðfinnsson

Kristinn Ágúst Friðfinnsson (f. 27. ágúst 1953 í Reykjavík) er sóknarprestur í Selfossprestakalli.

Uppruni, fjölskylda og menntun

Foreldrar Kristins voru hjónin Ósk Sophusdóttir (f. 1930) og Friðfinnur Kristinsson (1926 - 1982). Maki Kristins er Anna Margrét Guðmundsdóttir hjúkrunarfræðingur (f. 1955). Börn þeirra: Friðfinnur Freyr viðskiptafræðingur (f. 1980), Melkorka Mjöll BA í heimspeki, lögfræðinemi (f. 1981), Magnús Már verkfræðinemi (f. 1986) og Kolbeinn Karl viðskiptafræðingur, meistaranemi við CBS í Kaupmannahöfn (f. 1987).

Kristinn lauk stúdentsprófi frá Menntaskólanum við Hamrahlíð 1975, lærði einsöng við Tónlistarskóla Reykjavíkur 1975 - 1978 og lauk embættisprófi í guðfræði frá Háskóla Íslands 1981. Lokaritgerð hans fjallaði um félagslega siðfræði. Hann annaðist um tíma á námsárunum aðstoðað í Hveragerðis- og Selfossprestaköllum. Kristinn stundaði einnig framhaldsnám í sifjarétti, trúarlífssálarfræði, sálgæslufræði og klínískri samtalstækni.

Helstu störf

Kristinn kenndi alls fjögur ár siðfræði við Þroskaþjálfaskóla Íslands en síðar tungumál á Selfossi, auk þess að halda námskeið, flytja fyrirlestra og leiðbeina við Þingborgarskóla. Hann fékkst við fréttaritun og dagskrárgerð fyrir Ríkisútvarpið 1978 - 1984 en síðar hjá Útvarpi Suðurlands. Hann var sóknarprestur í Staðarprestakalli í Súgandafirði 1981 - 1984, framkvæmdastjóri Skálholtsútgáfunnar 1984 - 1985 og vann við tryggingaráðgjöf 1986 - 1988. Hann gegndi í forföllum sem sóknarprestur í Seljaprestakalli í Reykjavík 1988, í dómkirkjusöfnuðinum 1989 og á Selfossi 1994. Var aðstoðarprestur í Árbæjarkju 1989 - 1991 og annaðist helgihald í safnkirkju Árbæjarsafns í Reykjavík frá 1989, sóknarprestur í Hraungerðisprestakalli í Árnessýslu frá 1991 og þjónaði einnig Laugardælum og Villingaholti. 2009 bættist Selfosssókn við prestakall hans, sem þá fékk nafnið Selfossprestakall. Kristinn var trúnaðarmaður fatlaðra á Suðurlandi frá 1993 - 2011. Hann hefur nokkrum sinnum verið settur meðdómandi í héraði í sifjaréttarmálum.

Félags- og trúnaðarstörf

Kristinn var forseti Nemendafélags MH, sat í Stúdentaráði HÍ og í stjórn þess og var fulltrúi stúdenta í háskólaráði og fleiri nefndum skólans. Hann var allmörg ár stjórnarmaður í Æskulýðssambandi Íslands og í Æskulýðsráði Reykjavíkur, auk heldur formaður í nefnd um rekstur æskulýðsmiðstöðvarinnar Bústaða og fulltrúi á ráðstefnum og fundum um námsmanna- og æskulýðsmál (meðal annars Evrópuráð æskunnar í Hollandi 1979 og höfuðborgarráðstefna Norðurlanda um æskulýðsmál 1980). Fulltrúi á Evrópuþingi presta 1994. Í æskulýðsnefnd Þjóðkirkjunnar 1981 - 1984. Skipaður 1983 í undirbúningsnefnd Alþjóðaárs æskunnar 1985. Í stjórn Prestafélags Íslands 1992 - 1998, varaformaður um tíma en lengst kjarafulltrúi. Beitti sér fyrir endurskoðun á siðareglum presta. Skipaður 1995 í nefnd um aukatekjur presta. Formaður Sunddeildar Ungmennafélags Selfoss og í aðalstjórn UMFS frá 1999. Tók 1998 við umhverfisverðlaunum Árborgar fyrir hönd Sunddeildarinnar, en sjálfur hafði Kristinn tekið þátt í götuhreinsun á vegum hennar. Sat einnig í mörgum öðrum nefndum hjá hinu opinbera og félagasamtökum.

Leiklistarferill og ritstörf

Kristinn hefur komið fram í að minnsta kosti 17 kvikmyndum. Hann lék ferjumanninn í Börnum náttúrunnar (1991), læriföður í Myrkrahöðingjanum (2000), prestinn í lokaatriði 101 Reykjavík (2000) og annan prest í myndinni Mýrin (2006). Auk þess kom hann fram í Hvítum mávum (1985), stuttmynd byggðri á þjóðsögu um niðurkvaðningu draugs í Villingaholtskirkjugarði (2004), Bjólfskviðu (2006), Den brysomme mannen (2006), Reykjavik Whale Watching Massacre (2009), Hótel jörð (2009), Óróa (2010), Kurteisu fólki (2011), Borgríki (2011), Rétti, framhaldsþættir í sjónvarpi (2012), Hreinu hjarta, heimildarmynd (2012) og fleiri myndum.

Kristinn hefur skrifað fjölda greina í blöð og tímarit, meðal annars í Kirkjuritið og Þroskahjálp. Hann þýddi tvær víðlesnar bækur eftir Norman Vincent Peale: Fjársjóður jólanna (1993) og Máttur bænarinnar (1994, 2000). Hann var ritstjóri Orðsins 12. - 13. árg. 1977 - 1979, ritstýrði og sá um útgáfu á Fréttabréfi Húseigendafélagsins og sat í ritnefnd Kirkjuritsins.

Ítarefni

Internet Movie Database, The: Kristinn Ágúst Friðfinnsson. Skoðað 8. október 2010.