Kristín Ingólfsdóttir
Kristín Ingólfsdóttir er rektor Háskóla Íslands. Hún tók við stöðu rektors árið 2005 af Páli Skúlasyni. Hún hefur verið skipuð í embætti annað kjörtímabil frá 1. júlí 2010. Kristín starfaði áður sem prófessor við Lyfjafræðideild Háskóla Íslands.
Kristín útskrifaðist úr eðlisfræðideild Menntaskólans í Reykjavík, stundaði nám í efnafræði og frönsku í Frakklandi og lyfjafræðinám við Háskóla Íslands. Hún lauk doktorsprófi (PhD) frá lyfjafræðideild King's College, University of London 1983. Rannsóknir Kristínar hafa einkum beinst að lyfjaefnafræðilegri greiningu á efnum í íslenskum plöntum og sjávarlífverum sem hafa bólgueyðandi, veiruhemjandi, bakteríuhemjandi og ónæmisörvandi virkni sem og efnum sem hemja vöxt illkynja frumna. Kristín hefur flutt erindi fyrir fagfólk í heilbrigðisvísindum víða um heim auk fjölda erinda og námskeiða fyrir innlend fagfélög, félagasamtök og almenning.
Auk kennslu-, vísinda- og stjórnunarstarfa við Lyfjafræðideild sat Kristín í fjármálanefnd háskólaráðs HÍ, deildarráði Læknadeildar og stjórn Reykjavíkur apóteks. Kristín sat í stjórn Rannsóknarráðs Íslands og var varamaður í stjórn Vísindasjóðs Vísinda- og tækniráðs. Kristín var formaður vísindanefndar Krabbameinsfélags Íslands og fulltrúi Íslands í stjórn Nordisk Forskerutdannings Akademi (NorFA, nú NordForsk). Kristín hefur unnið ýmis trúnaðarstörf fyrir heilbrigðisráðuneytið, átti um árabil sæti í Lyfjanefnd ríkisins og Lyfjanefnd Lyfjastofnunar og hefur tekið þátt í starfi evrópsku lyfjamálastofnunarinnar (EMEA). Kristín er nú stjórnarmaður í Samtökum norrænna háskóla (NUS) og stjórnarmaður í Samtökum evrópskra háskóla (EUA).
Kristín hóf rektorstíð sína með því að hrinda af stað stefnumótun í víðtæku samráði sem miðar að því að Háskóli Íslands nái afburðaárangri í kennslu og vísindum. Eftir fjögurra ára eftirfylgni sést markverður árangur, staðfestur með alþjóðlegum mælikvörðum sem lagðir eru á störf háskóla. Birtingum rannsóknaniðurstaðna í kröfuhörðustu alþjóðlegum (ISI) tímaritum hefur fjölgað um 84%, doktorsnám hefur verið styrkt verulega og árlegur fjöldi doktorsvarna hefur meir en tvöfaldast. Háskóli Íslands hefur stóraukið samstarf við fremstu háskóla í Bandaríkjunum, Evrópu og Asíu og stúdentum við HÍ bjóðast í æ ríkara mæli tækifæri til að stunda hluta af námi sínu við slíka háskóla. Mikil áhersla hefur verið lögð á að bæta kennslu og innleiða nýja kennsluhætti. Yfirgripsmiklar stjórnkerfis- og skipulagsbreytingar hafa verið gerðar í Háskóla Íslands til að bæta stjórnun og þjónustu og auðvelda skólanum að ná markmiðum sínum. Háskóli Íslands og Kennaraháskóli Íslands voru sameinaðir 1. júlí 2008. Stúdentar við Háskóla Íslands eru nú um 14.500 stúdentar við Háskóla Íslands og hefur fjölgað um 45% á fjórum árum. Erlendir stúdentar eru um 1.100 talsins.
Kristín var sæmd Riddarakrossi hinnar íslensku fálkaorðu árið 2007 fyrir framlag til menntunar og rannsókna. Hún var sæmd Mykolas Romeris verðlaununum af Mykolas Romeris háskólanum í Vilnius í Litháen árið 2006.
Kristín hefur sem rektor flutt fjölda erinda innanlands og utan. Af nýlegum erindum má nefna: Fræ til framtíðar - menntun, vísindi, nýsköpun á ráðstefnu Félags viðskiptafræðinga og hagfræðinga (feb. 2009); Menntun á tímum endurreisnar á Iðnþingi Samtaka iðnaðarins (mars 2009); Changes in Challenging Times við Harvard háskóla, Boston (mars 2009); Role of Universities in Times of Economic Recovery við Waseda og Kinki háskólana í Japan (okt. 2009); Framkvæmd fjárlaga 2010: Áætlanagerð, ákvarðanataka og aðgerðir á ráðstefnu Samtaka atvinnulífsins, Félags forstöðumanna ríkisstofnana og Fjármálaráðuneytisins (nóv. 2009); Road to Equality – Overcoming Barriers á ráðstefnu kvenrektora frá Evrópu og Asíu, Istanbúl, Tyrklandi (apríl 2010); Sino-Icelandic Collaboration in Research and Higher Education við Fudan háskóla, Shanghai, Kína (maí 2010).
Kristín er gift Einari Sigurðssyni, forstjóra Mjólkursamsölunnar ehf. og Auðhumlu svf. Þau eiga tvær dætur, Hildi Einarsdóttur, rafmagnsverkfræðing hjá Össuri hf. og Sólveigu Ástu Einarsdóttur, nemanda í Menntaskólanum í Reykjavík.
Þetta 
