Kjörbarn

Úr Wikipediu, frjálsa alfræðiritinu

Kjörbarn er barn sem hefur verið ættleitt. Ættleiðing á sér stað þegar barn eignast nýtt lagalegt foreldri, ýmist til viðbótar eða með útskiptingu. Hið nýja foreldri mun því bera sömu lagalegu réttindi og skyldur gagnvart kjörbarninu líkt og það væri sitt eigið barn, og einnig slitið á lagaleg tengsl við fyrri foreldri ef því er að skipta. Áhrifin eru gjörólík því að taka barn í fóstur, en þar slitna ekki hin lagalegu tengsl barnsins við kynforeldri sín.

Þegar einstaklingur ættleiðir stjúpbarn sitt, þ.e. barn maka síns frá fyrra sambandi, er talað um stjúpættleiðingu en annars er talað um frumættleiðingu.

Frumættleiðing[breyta | breyta frumkóða]

Frumættleiðing er ættleiðing á barni sem ekki er barn eða kjörbarn maka umsækjanda eða sambúðarmaka. Frumættleiðing greinist svo í ættleiðingar innan lands og ættleiðingar milli landa.

Ættleiðingar á Íslandi[breyta | breyta frumkóða]

Á Íslandi hlýtur ættleitt barn sömu lagalegu tengsl við kjörforeldra sína eins og ef barnið væri þeirra eigið.[1] Ekki er hægt að fella ættleiðingu niður.[1]

Ef fólk vill ættleiða barn á Íslandi er miðað við að væntanlegir foreldrar séu 25-45 ára, séu heilbrigðir andlega og líkamlega, hafi hreina sakaskrá og geti framfleytt fjölskyldu. Fólk sem er í óvígðri sambúð þarf að hafa búið saman í fimm ár, en gift fólk í þrjú ár. Einhleypum einstaklingum er heimilt að ættleiða barn ef sérstaklega stendur á og ættleiðing er ótvírætt talin barninu til hagsbóta.

Eina ættleiðingarfélagið á Íslandi er Íslensk ættleiðing.[2] Það annast milligöngu um ættleiðingar frá Búlgaríu, Kína, Kólumbíu, Tékklandi og Tógó.[2]

Tenglar[breyta | breyta frumkóða]

Sjá einnig[breyta | breyta frumkóða]

Tilvísanir[breyta | breyta frumkóða]

  1. 1,0 1,1 „Ættleiðingar“. Sýslumenn. Sótt 2. nóvember 2020.
  2. 2,0 2,1 „Um félagið“. Íslensk ættleiðing. Sótt 2. nóvember 2020.