Karl Ágúst Úlfsson
Úr Wikipediu, frjálsa alfræðiritinu
Karl Ágúst Úlfsson (f. 4. nóvember 1957) er íslenskur leikari, leikstjóri, rithöfundur, þýðandi og leikskáld. Hann varð stúdent frá Menntaskólanum í Hamrahlíð 1977, lauk námi frá Leiklistarskóla Íslands 1981 og lék í mörg ár á sviði, í sjónvarpi og í kvikmyndum. Karl Ágúst lauk meistaragráðu í leikritun og handritagerð við Ohio University árið 1994. Fjögur verka hans hafa verið sett á svið í Bandaríkjunum; The Guarding Angel, A Guy Named Al, Body Parts og The Iceman Is Here. Meðal leikverka Karls Ágústs sem sýnd hafa verið á Íslandi eru Í hvítu myrkri í Þjóðleikhúsinu, söngleikirnir Fagra veröld, Sól & Máni og Gosi í Borgarleikhúsinu og Ó, þessi þjóð í Kaffileikhúsinu, Stóllinn hans afa sem Hafnarfjarðarleikhúsið sýndi á vinnustöðum og sjónvarpsleikritin Fyrsta atriði, Æ, æ og Ást í bakaríi. Auk þess hefur hann þýtt yfir þrjátíu leikverk fyrir útvarp og leiksvið, þar á meðal leikritið Pétur Gautur sem sýnt var í Þjóðleikhúsinu og söngleikina Kabarett, Saga úr vesturbænum, Galdrakarlinn í Oz, Rent, Syngjandi í rigningunni, Með fullri reisn og "Jesus Christ Superstar".
Í dag þekkja landsmenn hann einna helst sem einn höfunda, leikstjóra og leikara í Spaugstofunni sem Karl stofnaði árið 1985 ásamt fjórum félögum sínum. Þar hefur hann skapað margar ódauðlegar persónur, svo sem nirfilinn Silla, Geir löggu og Steindór leigubílstjóra í 25 ár. Auk þess hefur Karl starfað sem uppistandari og veislustjóri um árabil og með Spaugstofunni hefur hann ferðast um landið með sýningarnar "Í gegnum grínmúrinn", "Spaugstofan á fleygiferð" og "Enn einn hringurinn".
Karl hefur einnig lagt nokkra stund á kennslu, bæði í leikritun og skapandi skrifum og meðal annars kennt við Háskóla Íslands, Endurmenntunarstofnun, Listaháskólann, Leikslistarskóla Bandalags leikfélaga, Leiklistarskóla Færeyja og Mesa State College í Colorado. Auk þess hefur hann flutt fjölda fyrirlestra um kímni, hlátur og gildi þess að brosa í lífinu. Hann hefur einnig verið virkur í félagsstörfum, m.a. starfað í stjórn Félags íslenskra leikara og Félags leikskálda og handritahöfunda en undanfarin 6 ár hefur hann átt sæti í stjórn Rithöfundasambands Íslands. Nýverið hefur Karl bætt við sig enn einu starfsheitinu en það er trumbuleikari og stjórnandi trumbuhringja. Karl hefur sótt námskeið í trommuleik og afríkutöktum víða um heim og hefur síðan verið iðinn við að kynna þetta nýjasta áhugamál sitt fyrir landanum.
Árið 2007 hlaut Karl Ágúst, ásamt konu sinni Ásdísi Olsen, Íslensku Menntaverðlaunin fyrir brautryðjendastarf á sviði námsefnisgerðar í lífsleikni. Sama ár var hann útnefndur bæjarlistamaður Garðabæjar.
[breyta] Tengill
Þetta æviágrip sem tengist leikurum og Íslandi er stubbur. Þú getur hjálpað til með því að bæta við greinina.
