Internet Encyclopedia of Philosophy

Úr Wikipediu, frjálsa alfræðiritinu
Stökkva á: flakk, leita

Internet Encyclopedia of Philosophy er alfræðivefur um heimspeki sem var stofnaður af James Fieser árið 1995 með það að markmiði að veita almenningi aðgang að ítarlegu og fræðilegu lesefni um meginhugtök heimspekinnar og helstu heimspekinga á öllum sviðum heimspekinnar. Vefurinn er ekki rekinn í hagnaðarskyni og byggir á sjálfboðavinnu ritstjóra jafnt sem greinarhöfunda.

Flestar greinar á vefnum eru samdar af heimspekingum sem teljast sérfræðingar á sínu sviði og eru ritrýndar. Þó hefur verið brugðið á það ráð að nota tímabundið efni sem er laust undan höfundarétti og ritgerðir eftir framhaldsnema þar til varanleg grein hefur verið samin. Greinar á vefnum eru almennt taldar vandaðar en aðgengilegar.

Allt frumsamið efni á vefnum er varið af höfundaréttarlögum (tímabundnar greinar sem eru ekki varðar af höfundaréttarlögum eru sérstaklega merktar). Eigi að síður leyfa ritstjórar vefsins að efni á vefnum sé dreift að örfáum skilyrðum uppfylltum:

  1. Fjölrita má efni vefsins sem hluta af námsefni handa nemendum.
  2. Bókaútgefendur mega endurprenta efni af vefnum að fengnu leyfi ritstjóra vefsins.
  3. Ekki má dreifa efni vefsins annars staðar á veraldarvefnum.

Að vefnum starfa 25 ritstjórar og um 200 greinahöfundar. Alla jafnan hafa greinahöfundar doktorsgráðu í heimspeki og starfa við háskólakennslu. Aðalritstjórar vefsins eru James Frieser, stofnandi vefsins, og Bradley Dowden.

Heimildir[breyta]

Tengt efni[breyta]

Tengill[breyta]