Ilmenít

Úr Wikipediu, frjálsa alfræðiritinu
Stökkva á: flakk, leita

Ilmenít (FeTiO3) er veikt segulmögnuð járn-svört eða stál-grá steind sem finnst í myndbreyttu- eða djúpbergi. Nafnið dregur steindin af fundarstað sínum í Il'menski-fjöllum, nærri Miass í Rússlandi. Ilmenít er mest unnið úr fjörusandi. Það er samsett úr járn-títanoxíði á kristölluðu formi.

Unnið ilmenít er mest notað sem hráefni í litarefni. Afurð þeirrar vinnslu er títan-díoxíð sem er afar hvítt efni og notað sem grunnur í hágæða málningu. Í fjörusandi finnst ilmenít yfirleitt sem hringlaga agnir sem eru um 0,1 - 0,2 mm í þvermál.

Tunglilmenít[breyta]

Ilmenít finnst í bergi á Tunglinu og árið 2005 notaði NASA Hubble-geimsjónaukann til að staðsetja þar svæði sem innihalda steindina í ríkum mæli, en það gæti verið mikilvægt ef horft er til hugsanlegrar Tunglstöðvar í framtíðinni. Ilmenít myndi vera uppspretta járns og títans sem byggingarefna og einnig væri hægt að vinna úr steindinni súrefni.