Hilary Duff

Hilary Duff
Hilary Duff árið 2009
Fædd(ur)	Hilary Erhard Duff 28. september 1987 (1987-09-28) Houston, Texas, USA
Starf/staða	Leikkona, Söngkona, Lagasmiður, Tískuhönnuður, Kvikmyndaframleiðandi o.fl.

Hilary Erhard Duff (fædd 28. september 1987) er bandarísk leik- og söngkona en hún er líka lagasmiður. Eftir að hafa leikið í bæjarleikhúsi og sjónvarpsauglýsingum í æsku, varð Hilary fræg fyrir að leika aðalhlutverkið í þáttaröðinni Lizzie McGuire. Hún hélt áfram að leika og eignaðist farsælan kvikmyndaferil og eru vinsælustu myndirnar hennar meðal annars Cheaper by the Dozen, The Lizzie McGuire Movie og A Cinderella Story.

Hilary hefur markað innkomu sína í popptónlist, með þremur RIAA platínu-plötum og hafa þær selst í fleiri en 13 milljónum eintaka um allan heim. Fyrsta stúdíóplatan hennar, Metamorphosis (2003), varð þreföld platínuplata og fylgdu aðrar tvær platínumplötur í kjölfarið, Hilary Duff (2004) og Most Wanted (2005). Nýjasta plata Hilary, Dignity kom út í apríl 2007, hún komst í gull í ágúst þetta sama ár og komu út tvær smáskífur af plötunni With Love og stærsta smáskífan hennar til þessa, Stranger.

Hún hefur einnig gefið frá sér fatalínuna „Stuff by Hilary Duff“ og tvö ilmvötn með Elizabeth Arden. Hilary og móðir hennar voru skráðar sem framleiðendur myndarinnar Material Girls. Hilary kemur fram á kreditlista myndarinnar Greta sem framleiðandi.

Æska

Hilary Duff á MuchMusic verðlaununum árið 2007

Hilary fæddist í Houston í Texas 28. september 1987. Hún er annað barn Susan Colleen, húsmóður og kvikmyndaframleiðanda og Robert Erhard Duff, hluteiganda í keðjubúð með þægindavörur, sem var staðsett í Houston. Hún á eldri systur, Haylie Duff, sem er einnig söng-og leikkona. Móðir Hilary hvatti hana til þess að fara í leiklistartíma með systur sinni sem varð til þess að þær fengu báðar hlutverk í hinum ýmsu leikritum. Þegar Duff-systurnar voru átta og sex ára, tóku þær þátt í balletsýningunni Hnetubrjótnum með Columbus BalletMet í San Antonio. Systurnar urðu áhugasamari um að verða atvinnuleikkonur og að lokum fluttu þær til Kaliforníu með móður sinni en faðir þeirra varð eftir í Houston til þess að sjá um fyrirtækið. Eftir nokkur ár af áheyrnaprufum og fundum með umboðsmönnum fengu Duff systurnar hlutverk í nokkrum sjónvarpsauglýsingum.

Ferill

Fyrstu árin

Fyrstu árin í ferli Hilary innihéldu að leika lítil hlutverk, sem byrjaði með litlu hlutverki í sjónvarpsþáttaröð á Hallmark sem hét True Women árið 1997. Hún lék einnig stutt hlutverk í dramanu Playing By Heart árið 1998. Fyrsta stóra hlutverkið hennar var þegar hún lékk ungu nornina Wendy í annarri myndinni um teiknimyndadrauginn Casper, Casper Meets Wendy. Myndin fékk þó ekki mjög góða dóma.

Árið 1999 lék Hilary lítið aukahlutverk í sjónvarpskvikmyndinni The Soul Collector sem var byggð á skáldsögu eftir Kathleen Kane. Duff vann Young Artist Award fyrir frammistöðu sína.

Fyrsta alvöru hlutverk hennar var þegar hún var ráðin sem ein af krökkunum í fyrsta þættinum af gamanþættinum Daddio árið 2000. Meðleikari hennar, Michael Chiklist sagði „Eftir að hafa unnið með henni fyrsta daginn, man ég eftir því að hafa sagt við konuna mína; Þessi unga stelpa á eftir að verða stjarna. Hún var fullkomlega róleg og ánægð með sjálfa sig.“ Hlutverk Duff var fellt niður áður en Daddio fór í loftið sem gerði það að verkum að hana langaði ekki lengur að vera leikkona. Umboðsmanninum hennar og móður hennar tókst þó að sannfæra hana um að halda áfram og viku seinna fór hún í prufur fyrir nýjan þátt, Lizzie McGuire þar sem hún lék titilhlutverkið, klaufska en venjulega grunnskólastelpu. Þátturinn einbeitti sér að því að hún var að verða unglingur.

2001-2003

Lizzie McGuire, sem var fyrst sýndur á Disney Channel þann 12. janúar 2001 fékk frábært áhorf, 2,3 milljónir áhorfenda á hvern þátt. Þátttaka hennar í þáttunum leiddi til þess að þeir urðu mjög vinsælir meðal krakka á aldrinum 7-14 ára og kallaði New York Daily News hana 2002 árgerð af Annette Funicello. Eftir að Duff hafði uppfyllt 65 þátta samning sinn við þættina íhugaði Disney Channel að halda áfram með þættina en á ABC-stöðinni. Þær áætlanir brugðust þegar samningarmenn Duff sögðu að hún fengi ekki nógu mikið kaup. Duff lék líka í Disney Channel myndinni Cadet Kelly árið 2002 og fékk hún mesta áhorf sem stöðin hafði fengið í 19 ára sögu sinni. Í kvikmyndinni lék hún frjálslega stelpu sem fer í herskóla og á erfitt með að aðlagast ströngum reglum og hörðu umhverfinu.

Hilary í kanadískum spjallþætti árið 2007

Fyrsta hlutverk Duff í kvikmynd sem fór í kvikmyndahús var Human Nature árið 2002. Þetta sama ár tók Duff upp útgáfu af laginu „I Can't Wait“ með Brooke McClymont fyrir Lizzie McGuire og lagið „The Tiki Tiki Tiki Room“ fyrir fyrstu DisneyMania-safnplötuna. Fyrsta platan hennar hét Santa Claus Lane og var hún gefin út árið 2002. Titillag plötunnar var í myndinni Santa Claus 2 og smáskífa af plötunni What Christmas Should Be var í Cheaper By the Dozen. Duff söng nokkur lög fyrir Lizzie McGuire kvikmyndina, sem innihélt meðal annars lögin I Can't Wait og Why Not. Platan með lögunum úr myndinni náði platínumsölu árið 2003.

Árið 2003 fékk Hilary fyrsta stóra hlutverkið sitt í kvikmynd þegar hún var ráðin ásamt Frankie Muniz í kvikmyndina Agent Cody Banks. Myndin fékk jákvæða dóma og gekk nógu vel til þess að gefa af sér aðra mynd, sem Hilary lék ekki í. Þetta sama ár endurtók Duff hlutverk sitt sem Lizzie McGuire í samnefndri kvikmynd og fékk hún bæði góða og slæma dóma. Seinna þetta ár lék Hilary eitt af 12 börnum Steve Martin og Bonnie Hunt í Cheaper by the Dozen sem er tekjuhæsta mynd hennar til þessa. Hún endurtók þetta hlutverk í seinni myndinni, Cheaper by the Dozen 2 sem náði litlum vinsældum.

Fyrsta stúdíó-plata Hilary, Metamorphosis sem kom út árið 2003, náði góðum árangri bæði í Bandaríkjunum og Kanada og hafði selst í 3,7 milljónum eintaka í maí 2005. Fyrsta smáskífan, So Yesterday varð vinsæl í mörgum löndum; og náði titillag þáttanna Laguna Beach og jafnframt önnur smáskífa plötunnar, „Come Clean“, enn meiri vinsældum og náði hún á topp 20 lista í Bretlandi, Ástralíu og Nýja Sjálandi. Myndbandið var tilnefnt sem Besta pop-myndbandið árið 2004 á tónlistarverðlaunum MTV. Þriðja smáskífa plötunnar, Little Voice, var ekki gefin út í Bandaríkjunum og varð smásmellur í Kanada og Ástralíu. Seinnipart árs 2003 lagði Hilary af stað í sína fyrstu tónleikaferð sem bar nafnið Most Wanted-túrinn. Í stærri borgum seldist upp á mestalla tónleikana hennar.

Duff hefur einnig leikið gestahlutverk í sjónvarpsþáttum, það fyrsta var sem veikt barn í læknadramanu Chicago Hope í mars 2000. Árið 2003 lék hún í þætti af George Lopez sem farðasölukona; hún lék aftur í þættinum árið 2005 sem Kenzie, femínista-skáld sem var vinkona Carmen. Árið 2003 lék hún á móti systur sinni, Haylie í American Dreams og árið 2005 lék hún bekkjarfélaga titilpersónu þáttanna Joan of Arcadia.

2004-2006

Í janúar 2004 kom diskurinn DisneyMania 2 út og söng Hilary dúett með systur sinni í laginu „The Siamese Cat Song“. Hún söng líka annað lag, „Circle of Life“ ásamt öðrum Disney Channel-stjörnum. Duff og systir hennar tóku upp lagið „Our Lips Are Sealed“ með The Go-Go's fyrir kvikmyndina A Cinderella Story, sem innihélt tvö önnur lög með Hilary. Myndbandið við „Our Lips Are Sealed“ var vinsælt á MTV en lagið sjálft náði ekki á Billboard-listann.

Önnur stúdíóplata Duff var sjálftitlaða platan Hilary Duff þar sem hún samdi sum lögin með öðrum. Hún lýsti plötunni sem persónulegri og með meiri rokktilfinningu en sú fyrri. Platan kom út á sautján ára afmælisdaginn hennar (í september 2004) og náði miklum vinsældum í Bandaríkjunum og Kanada. Platan seldist í yfir 1,5 milljónum eintaka í Bandaríkjunum á átta mánuðum en eina smáskífa plötunnar Fly náði ekki inn á vinsældarlistana. Í Ástralíu náði Fly vinsældum og gaf platan þá af sér aðra smáskífu, Someone's Watching Over Me, sem var einnig lag í kvikmyndinni Raise Your Voice.

Árið 2004 lék Duff í rómantísku gamanmyndinni A Cinderella Story. Þrátt fyrir að myndin fengi slæma dóma varð hún mjög vinsæl og voru gagnrýnendur ánægðir með frammistöðu Hilary. Myndin halaði inn 70.067.909 dölum um allan heim. Seinna þetta ár lék Hilary í dramatísku myndinni Raise Your Voice. Á meðan sumir gagnrýnendur voru glaðir að sjá Hilary taka að sér alvarlegri hlutverk kolféll myndin og fékk slæma dóma og litlar vinsældir. Nokkrir gagnrýnendur voru sáttir með leik Duff en voru ekki ánægðir með röddina hennar og sögðu að hún væri eins og úr tölvu. Raise Your Voice er misheppnaðasta mynd Duff í vinsældum. Þetta ár fékk Hilary fyrstu tilnefningu sína til Razzie-verðlaunanna fyrir verstu leikkonu fyrir Raise Your Voice og a Cinderella Story.

Árið 2005 lék hún í The Perfect Man þar sem hún var í hlutverki elstu dóttur fráskilinnar móður (Heather Locklear). Myndin fékk að mestu leyti neikvæða dóma og náði ekki eins miklum tekjum og búist var við (náði 19.770.475 dollurum). Sama ár fékk Hilary aðra Razzie tilnefningu fyrir The Perfect Man og Cheaper by the Dozen 2. Kvikmyndin Material Girls sem hún lék í ásamt systur sinni árið 2006 fékk heldur ekki góða dóma. Myndinni var leikstýrt af Mörthu Coolidge og var meðal annars framleidd af fyrirtæki Madonnu, Maverick Entertainment, og sagði frá tveimur ríkum systrum sem þurfa að berjast fyrir því að fá fjölskyldufyritækið aftur í hendurnar eftir skandal sem gerir næstum því útaf við fyrirtækið. Systurnar fengu hvor um sig eina tilnefningu til Razzie verðlaunanna fyrir hlutverk sín í myndinni.

Þriðja plata Hilary, Most Wanted, kom út árið 2005 og innihélt uppáhaldslögin hennar af síðustu tveimur plötum, remix og ný lög sem voru í anda The Killers og Muse. Þegar hún kom fram í Total Request Live sagði Duff að þetta væri ekki plata með bestu lögunum, heldur hafði plötufyrirtækið sem hún var á samningi hjá sagt henni að það væri kominn tími á nýja plötu. Hún hafði meiri stjórn yfir Most Wanted en hinum tveimur og skrifaði nýtt efni með framleiðendunum Joel Madden og bróður hans, Benji en báðir eru meðlimir í Good Charlotte. Aðalsmáskífan, Wake Up, varð vinsælasta smáskífa Hilary frá upphafi og fékk myndband lagsins mikla spilun á MTV. Myndband við aðra smáskífu plötunnar, Beat of my Heart, varð einnig vinsælt en lagið sjálft náði ekki eins miklum vinsældum. Platan náði fyrsta sæti á Billboard 200 listanum og varð hún þriðja platan hennar sem náði 1. sæti í Kanada. Duff tók upp ný lög fyrir myndina Material Girls, meðal annars Timbaland útgáfu af Madonnu laginu, „Material Girl“, með systur sinni.

Árið 2005 virtist Hilary hafa misst nokkur kíló og fóru fjölmiðlar að tala um hvort hún væri með átröskun, þrátt fyrir að hún hafi neitað þeim ásökunum. Duff fór í viðtal í ástralskan þátt og sagðist hafa lést þegar hún tók upp virkari lífstíl. Árið 2006 kom fram í Digital Spy, að Hilary hafi verið komin niður í stærð 0 vegna þess að fjölmiðlar sögðu að hún hefði þyngst um rúmlega 7 kíló. Hún sagði seinna að hún hafi verið undir pressu að vera mjó, vegna þess að þegar þú ert frægur ertu annaðhvort of feitur eða of mjór.

Í júní 2006, þegar það var spurt um þáverandi kærastan hennar, Joel Madden, í viðtali við Elle, sagði Hilary: „Hann er mjög ekta, hann er frá frekar miklum gettó-stað í Maryland... mér líkar það“. Gettó-athugasemd Hilary olli nokkru fjaðrafoki.

Seint árið 2006 lagði Hilary fram kæru á hendur manns sem var að elta hana og herbergisfélaga hans. Þann 3. nóvember 2006 var maðurinn, Maksim Miakovsky, handtekinn fyrir að hóta að drepa hana. Hann varð kærður fyrir glæpsamlegar hótanir og fleira. Samkvæmt pappírum um málið frá Duff, hafði Miakovsky komið til Bandaríkjanna til þess að hitta og eiga í ástarsambandi við Hilary Duff. Hann var dæmdur í fimm ára fangelsi.

2007-2008

Þegar hún var í tónleikaferð tengdri Most Wanted kom hún fram í Guadalajara í Mexíkó og lék hún þá gesthlutverk í sápuóperunni Rebelde. Hún var líka gestastjarna í The Andy Milonakis Show í þriðju þáttaröðinni árið 2007. Í apríl 2008 var Duff boðið aðalhlutverk Annie Mills í þættinum 90210 en hún hafnaði hlutverkinu vegna þess að hún hafði meiri áhuga á því að finna hlutverk utan unglingageirans. Hún er einnig fyrirsæta og er á samningi hjá IMG módel skrifstofunni í New York.

Duff samdi sum lögin á þriðju stúdíóplötunni hennar, Dignity, ásamt Köru DioGuardi, sem framleiddi plötuna með Rhett Lawrence, Tim & Rob og Richard Vission. Duff sagði að platan væri með fleiri danslögum en hinar tvær og notaðist við fleiri alvöru hjlóðfæri. Hún sagði: „Ég veit ekki alveg hvernig ég á að útskýra það sem við erum að gera en það er skemmtilegt og fönkí og öðruvísi, eitthvað nýtt fyrir mér. Það er rosalega töff“.

Fyrsta smáskífan, Play with Fire, náði litlum vinsældum og gekk annarri smáskífunni, With Love, mun betur og varð hún vinsælasta smáskífa Hilary á U.S. Hot 100-listanum og náði fyrsta sæti á Billboard Hot Dance Club Play-listanum. Tónlistarmyndbandið við „With Love“ varð vinsælla en lagið sjálft og var notað sem auglýsing fyrir fyrsta ilmvatnið hennar, With Love ... Hilary Duff, og kom það á markað í september 2006. Platan kom út í apríl 2007 í Bandaríkjunum en aðeins fyrr annarstaðar. Platan náði góðum vinsældum í Bandaríkjunum, Kanada, Ástralíu og Bretlandi. Dignity-tónleikaferðin byrjaði um mitt ár 2007. Þriðja smáskífan, Stranger, náði efsta sæti á U.S. club hit-listanum.

Seinnipart árs 2005 léðu Duff systurnar teiknimyndinni Foodfight! raddir sínar. Leikstjórinn, Larry Kasanoff, sagði að það væri yndislegt að hafa Duff systurnar í leikaraliðinu. Duff lék síðan á móti John Cusack í War, Inc. sem kom í bíó í Los Angeles og á Manhattan í New York þann 23. maí 2008.

Þann 7. september 2007 staðfesti Duff að hún myndi leika í tveimur sjálfstæðum myndum, Greta og What Goes Up. Í júní 2008 gekk Duff til liðs við leikaralið gamanmyndarinnar Stay Cool. Hún lék á móti Winonu Ryder, Mark Polish, Sean Austin, Chevy Chase og Jon Cryer. Í myndinni leikur hún Shöstu O'Neil, sem er lýst sem kynþokkafullri menntaskólamær. Kvikmyndin var tekin upp í júlí og ágúst 2008 á Santa Clarita í Kaliforníu og kemur myndin út árið 2009.

Í nóvember 2008 kom önnur plata með bestu lögum Duff út og hét hún Best of Hilary Duff. Platan náði ekki þeim vinsældum sem Most Wanted hafði náð. Hilary tilkynnti stuttu eftir þetta að hún væri að fara frá Hollywood Records eftir sex ára samstarf. Hún tilkynnti síðan MTV að hún myndi byrja að vinna að nýrri plötu í desember 2008.

2009 - Framhaldið

Í janúar 2009 var tilkynnt um að Hilary myndi leika í kvikmyndinni The Story of Bonnie and Clyde, kvikmynd í ætt við Bonnie & Clyde. Í apríl 2009 hóf Hilary tökur á Provinces of Night sem er byggð á samnefndri bók eftir William Gay. Duff leikur Raven Halfacre, unglingsdóttur lauslátrar konu sem stríðir við áfengisvanda. Duff hefur líka skrifað undir samning um að leika í sjö þáttum sem Olivia Burke, kvikmyndastjörnu sem fer í NYU til þess að eiga venjulega háskólareynslu og endar í herbergi með Vanessu (Jessica Szohr) í Gossip Girl. Í ágúst 2009 var tilkynnt að Hilary Duff muni leika í The Business of Falling in Love, rómantískri gamanmynd byggð á bókinni Diary of a Working Girl eftir Daniellu Brosky og mun Gil Junger leikstýra. Myndin á að birtast á ABC Family-stöðinni og leikur Hilary tískublaðamann sem fer leynilega að vinna í viðskiptaheiminum með vonir um að finna ástina á meðan hún skrifar grein um það að fara á stefnumót með mönnum sem ganga um í jakkafötum. Til viðbótar við að leika í myndinni mun Hilary einnig framleiða hana og fara Frank Von Zerneck, Robert Sertner, Ira Pincus og Jessica Horowitz með önnur hlutverk.

Einkalíf

Í júní 2006 var haft eftir Hilary í viðtali við Elle: „[meydómur] er klárlega eitthvað sem mér líkar við sjálfa mig. Það þýðir samt ekki að ég hafi aldrei hugsað um kynlíf, vegna þess að allir sem að ég þekki hafa stundað það og þú vilt passa inn í hópinn.“ Duff sagði seinna við MuchMusic að hún hafi ekki sagt þetta beint í greininni og að þetta væri klárlega ekki eitthvað sem að hún myndi tala um. Hún neitaði þessu aftur árið 2008 í viðtali við tímaritið Maxim.

Duff tekur þátt í mörgum góðgerðarmálum svo sem dýraverndunarmálum og er meðlimur í Kids with a Cause. Hún hefur einnig gefið 250.000 dollara til fórnarlamba fellibylsins Katrínu. Árið 2005 gaf hún yfir 2,5 milljónir máltíða til fórnarlamba Katrínu í suðrinu. Í ágúst 2006 fór hún til New Orleans í grunnskóla þar og vann með hjálparsamtökum sem sáu um að dreifa mat. Hún hefur einnig tekið þátt í hjálparstarfi Audrey Hepurn Child Benefit Found og Kids with a Cause. 8. október 2008 lék hún í auglýsingu fyrir Think Before You Speak-samtökin (ísl. Hugsaðu áður en þú talar). Í júlí 2009 var hún valin ungur sendiherra til barna í Kólumbísku borginni Bogota. Sem sendiherra mun hún eyða fimm dögum í landinu og dreifa bakpokum fullum af mat til bana í nauð.

Árið 2005 voru tekjur Hilary metnar á 15 milljónir og í desember 2008 var Hilary í 7. sæti á lista Forbes yfir 20 tekjuhæsta fólkið undir 25 ára aldri og voru eignir hennar þá metnar á 12 milljónir. Árið 2007 varð Hilary í 23. sæti á lista Maxim Hot 100. Árið 2008 var hún valin sjöunda kynþokkafyllsta kona í heimi.

Duff hefur oft sagt að hún hafi mikinn áhuga á dýraverndunarmálum og hefur sagt þegar hún er spurð að því hvað hún væri að gera ef hún væri ekki fræg: „Mig langaði alltaf til þess að vera grænmetisæta þegar ég var yngri en svo áttaði ég mig á því að dýr deyja líka þá, svo að það var ekki fyrir mig. En klárlega eitthvað með börnum eða dýrum eða eitthvað svoleiðis.“

Sambönd

Duff byrjaði með söngvaranum Aaron Carter árið 2001. Þau hittust þegar hann var gestaleikari í Lizzie McGuire þáttunum í kringum jólin. Sambandið entist í tvö ár. Það var sagt að Carter hefði sagt Hilary upp fyrir Lindsay Lohan en hætti fljótlega með henni og byrjaði aftur með Duff. Carter sagði seinna að hann hefði haldið framhjá Duff með bestu vinkonu hennar og að hann hefði hryggbrotið Duff og iðraðist gjörða sinna. 23. mars 2007 virtust Duff og Lohan eiga í stríði. Það var seinna útskýrt sem stríð yfir Aaron Carter. Þær sættust þetta sama ár. Lohan kom í útgáfupartý plötunnar Dignity og sagði Hilary tímaritinu People að henni þætti Lohan skemmtileg og góð stelpa.

Duff byrjaði samband með söngvara Good Charlotte, Joel Madden árið 2004. Eftir miklar vangaveltur fjölmiðla tilkynnti móðir Hilary, Susan, sambandið í júní árið 2005. Duff og Madden hættu saman í nóvember 2006. Þetta sama ár skildu foreldrar Duff eftir 22 ár saman. Hún skrifaði um sársaukann eftir skilnaðinn í lögunum Stranger og Gypsy Woman.

Duff byrjaði með NHL-leikmanninum Mike Comrie árið 2007. 19. febrúar tilkynntu Duff og Comrie að þau væru trúlofuð eftir rúmlega tveggja ára samband.

Hlutverk

Kvikmyndir
Ár	Kvikmynd	Hlutverk	A.T.H.!
2001	Human Nature	Ung Lilja Jute
2001	Agent Cody Banks	Natalie Connors
	The Lizzie McGuire Movie	Lizzie McGuire
	Cheaper by the Dozen	Lorraine Baker
2004	A Cinderella Story	Samantha „Sam“ Montgomery (Öskubuska)
	Raise Your Voice	Teresa „Terri“ Fletcher
2005	The Perfect Man	Holly Hamilton
	Cheaper by the Dozen 2	Lorraine Baker
2006	Material Girls	Tanzania „Tanzie“ Marchetta	Einnig Framleiðandi
2008	War Inc.	Yonica Babyyeah
2009	What Goes Up	Lucy
	Greta	Greta	Aðalframleiðandi
	Stay Cool	Shasta O'Neil
2010	Foodfight!	Sunshine Goodness	Rödd
	Provinces of Night	Raven Halfacre
	The Story of Bonnie and Clyde	Bonnie Parker

Kvikmyndir gerðar fyrir sjónvarp / vídeó
Ár	Titill	Hlutverk	Dreifingaraðili
1998	Casper Meets Wendy	Wendy	20th Century Fox Home Entertainment
1999	The Soul Collector	Ellie	CBS
2002	Cadet Kelly	Kelly	Disney Channel
2004	In Search of Santa	Crystal	Miramax Family Films
2010	The Business of Falling in Love	-	ABC Family

Sjónvarp
Ár	Titill	Hlutverk	A.T.H.
2001 - 2004	Lizzie McGuire	Lizzie McGuire	Aðalhlutverk

Gestahlutverk í Sjónvarpi
Ár	Titill	Hlutverk	A.T.H.
2000	Chicago Hope	Jessie Seldon	Cold Hearts (17. þáttur, 6. þátaröð)
2003	American Dreams	Shangri-Las	Change a Comin (8. þáttur, 2. þáttaröð)
	George Lopez	Stephanie	Team Leader (22. þáttur, 2. þáttaröð)
2004	Fraiser	Britney	Fraiser-Lite (12. þáttur, 11. þáttaröð)
2005	Joan of Arcadia	Dylan Samuels	The Rise & Fall of Joan Giardi (14. þáttur, 2. þáttaröð)
2007	The Andy Milonakis Show	Hún sjálf	Andy Moves to L.A. (1. þáttur, 3. þáttaröð)
2009	Ghost Whisperer	Morgan Jeffries	Thrilled to Death (19. þáttur, 4. þáttaröð)
	Law & Order: SVU	Ashlee Walker	Selfish (19. þáttur, 10. þáttaröð)
	Gossip Girl	Olivia Burke	Aukahlutverk (3. þáttaröð, nokkrir þættir)

Tenglar

• Opinber vefsíða
• Fyrirmynd greinarinnar var „Hilary Duff“ á ensku útgáfu Wikipedia. Sótt ágúst 2009.