Guðmundur Andri Thorsson

Úr Wikipediu, frjálsa alfræðiritinu
Stökkva á: flakk, leita

Guðmundur Andri Thorsson (fæddur 31. desember 1957) er rithöfundur og ritstjóri, sonur Thors Vilhjálmssonar rithöfundar og konu hans Margrétar Indriðadóttur fréttastjóra. Hann skrifar reglulega pistla í Fréttablaðið.

Guðmundur Andri lauk stúdentsprófi frá MS árið 1978 og BA-prófi í íslensku og bókmenntafræði frá Háskóla Íslands árið 1983. Á árunum 1983-1985 stundaði hann nám til cand.mag.-prófs í íslenskum bókmenntum við HÍ.

Guðmundur Andri hefur starfað sem blaðamaður, gagnrýnandi, ritstjóri og þáttagerðarmaður. Hann er nú ritstjóri bóka hjá Forlaginu og ritstýrir jafnframt Tímariti Máls og menningar. Hann er söngvari og gítarleikari hljómsveitarinnar Spaða.

Fyrsta skáldsaga hans, Mín káta angist, kom út árið 1988 og síðan hefur hann sent frá sér nokkrar skáldsögur og hlotið fyrir þær ýmsar viðurkenningar. Meðal annars var hann tilnefndur til Íslensku bókmenntaverðlaunanna fyrir Íslenska drauminn 1991 og Íslandsförina 1996 og hlaut menningarverðlaun DV fyrir Íslenska drauminn. Hann hefur einnig þýtt allmargar bækur, skrifað formála og annast ritstjórn ýmissa bóka. Árið 2008 hlaut hann barnabókaverðlaun Menntaráðs Reykjavíkur fyrir þýðingu sína á Bangsímon eftir A.A. Milne.

Helstu verk[breyta]

  • Mín káta angist, skáldsaga, 1988.
  • Íslenski draumurinn, skáldsaga, 1991.
  • Íslandsförin, skáldsaga, 1996.
  • Ég vildi að ég kynni að dansa, greinar, 1998.
  • Náðarkraftur, skáldsaga, 2003.
  • Segðu mömmu að mér líði vel, skáldsaga, 2008.
  • Valeyrarvalsinn, smásögur, 2011.
  • Sæmd, skáldsaga, 2013

Heimildir[breyta]