Golf

Úr Wikipediu, frjálsa alfræðiritinu
Leikmenn á teigi á Spáni

Golf er íþrótt þar sem leikmenn reyna að koma kúlu í holu í sem fæstum höggum og er notast við kylfur með mismunandi fláa. Golf er ein af fáum íþróttum sem ekki er spiluð á ákveðið stórum velli eða vallarhelmingi, stærðin fer eftir stærð golfvallarins.

Golf er talið vera frá Skotlandi og hefur verið spilað í að minnsta kosti 500 ár á Bretlandseyjum. Elsti golfvöllur í heimi er Old Course völlurinn í St. Andrews. Golf eins og við þekkjum það í dag hefur verið spilað á Old Course í um 600 ár, svipaðar íþróttir voru þó leiknar nokkrum öldum fyrr.

Uppbygging golfvalla[breyta | breyta frumkóða]

Golfvellir skiptast í brautir sem hver hefur eina holu. Algengar vallarstærðir eru 9 eða 18 holu vellir sem hafa þá 9 eða 18 brautir.

Teigar[breyta | breyta frumkóða]

Mynd af tíum.

Golfleikur hefst ávallt á teig hverrar brautar en þar er svæði til að slá kúluna í átt að holu. Á teigi er notað sem hækkar kúluna frá vellinum. Tí má ekki nota í seinni höggum. Þrír ólíkir teigar eru á hverri braut og skiptast þeir á milli þeirra sem nota þá. Þannig fá atvinnumenn einn teig, karlar (áhugamenn) einn og konur og börn (áhugamenn) einn. Vellir sem hafa fjóra teiga eru þó líka til þ.e. atvinnumenn karlar (hvítir), áhugamenn karlar (gulir), atvinnumenn konur (bláir) og svo áhugamenn konur og börn (rauðir)

Braut[breyta | breyta frumkóða]

Þegar slegið er af teig er reynt að hitta á brautina, á brautinni geta verið margar hindranir s.s sandgryfjur, hólar og hæðir, tré og allt það sem venjulega má sjá í okkar daglega umhverfi. Í kringum brautina er þykkur graskargi, eða röff á daglegu máli golfara.

Flötin[breyta | breyta frumkóða]

Á flötinni, eða greeninu, er holan staðsett. Flatir hafa mismunandi halla og er grasið þar oftast betur hirt en á öðrum hlutum golfvallarins.

Gangur leiksins[breyta | breyta frumkóða]

Þar sem leikurinn gengur út á það að komast hringinn (allar holurnar) á sem fæstum höggum er oft viðmiðunarhöggfjöldi gefinn upp og kallast hann par vallar. Algengt par vallar er 72 en par holu fer aldrei yfir SEX.

Högg á holu hafa ólík nöfn eins og sjá má í töflunni að neðan:

Heiti Skýring
-4 kondór fjögur högg undir pari
-3 albatross þrjú högg undir pari
-2 örn tvö högg undir pari
-1 fugl eitt högg undir pari
0 par jafn mörg högg og par holunnar er
+1 skolli eitt högg yfir pari
+2 skrambi tvö högg yfir pari
kalkúnn fugl þrisvar í röð

Kúlan slegin[breyta | breyta frumkóða]

Til að koma kúlunni í holu er notuð golfkylfa. Þegar kúla hefur verið slegin má ekki taka hana upp nema hún sé á flöt og þá með því að merkja staðsetningu hennar með flatarmerki. Leikmaður notar eins mörg högg og þarf til að koma kúlunni í rétta holu en þó er siður að taka kúluna upp þegar komin eru fjögur högg yfir pari og fara yfir á næstu braut, sérstaklega þegar aðrir leikmenn bíða eftir því að leika brautina. Höggin þurfa að vera blanda af nákvæmni og lengd og er leikurinn því blanda af líkamlegri áreynslu og nákvæmni.

Skýringar á algengum orðum[breyta | breyta frumkóða]

  • Teighögg er alltaf fyrsta högg leikmanns á hverri braut, það er slegið af teig.
  • Pútt er högg sem slegið er á púttflöt og er vonandi síðasta höggið til að koma kúlunni í holuna. Við það er notaður pútter.
  • Húkk/Hook kallast það þegar kúlan er slegin til vinstri hjá rétthentum leikmönnum en til hægri hjá örvhentum.
  • Slæs/Slice er öfugt við húkk, þ.e. rétthentur leikmaður slær kúluna til hægri en örvhentur til vinstri.

Útbúnaður[breyta | breyta frumkóða]

Í golfi eru ekki gerðar kröfur til dýrs útbúnaður, en skulu leikmenn þó klæðast snyrtilegum klæðnaði. Kylfur þarf til leiksins og eru ólíkar útfærslur notaðar við ólík markmið.

Trékylfur[breyta | breyta frumkóða]

Trékylfur eru lengstu kylfurnar í pokanum og eru notaðar þegar slá þarf löng högg. Fláinn á trékylfum er frá 7,5° til 31° gráður. Skaftið er um 100 - 105 cm, lengdin má ekki fara yfir 47 tommur.

Járn[breyta | breyta frumkóða]

Járnkylfur

Járnin eru til styttri högga en trékylfurnar, járn hafa númer frá 1 og upp í 9 eftir fláa, því hærri tala, því meiri flái.

Pútter[breyta | breyta frumkóða]

Pútterinn (Potspaðinn) er notaður þegar kúlan liggur á flötinni, þá reyna kylfingar að sjá breikið (hallann) og ímynda sér hvernig kúlan eigi eftir að rúlla. Pútterinn er s.s. notaður í stutt og nákvæm högg.

Tengt efni[breyta | breyta frumkóða]