Birgir Ármannsson

Úr Wikipediu, frjálsa alfræðiritinu
Birgir Ármannsson (BÁ)

Birgir Ármannsson

Fæðingardagur: 12. júní 1968 (1968-06-12) (55 ára)
Fæðingarstaður: Reykjavík
9. þingmaður Reykjavíkurkjördæmis suður
Flokkur: Merki Sjálfstæðisflokksins Sjálfstæðisflokkurinn
Þingsetutímabil
2003-2009 í Reykv. s. fyrir Sjálfst.
2009-2013 í Reykv. s. fyrir Sjálfst.
2013-2021 í Reykv. n. fyrir Sjálfst.
2021 í Reykv. s. fyrir Sjálfst.
= stjórnarsinni
Embætti
2003-2005 6. varaforseti Alþingis
2005-2007 3. varaforseti Alþingis
2003-2005 Formaður Íslandsdeildar Vestnorræna þingmannaráðsins
2005-2007 Formaður íslandsdeildar Evrópuráðsþingsins
2007-2009 Formaður allsherjarnefndar
2013-2015 Formaður utanríkismálanefndar
2021- Forseti Alþingis
Tenglar
Æviágrip á vef Alþingis

Birgir Ármannsson (fæddur 12. júní 1968) er lögfræðingur útskrifaður frá Háskóla Íslands og alþingismaður í Reykjavíkurkjördæmi suður frá 2003-2013, frá 2013-2021 í Reykjavíkurkjördæmi norður og aftur í Reykjavíkurkjördæmi suður frá 2021 fyrir Sjálfstæðisflokkinn. Hann er einnig Forseti Alþingis frá 2021.

Birgir er sonur Ármanns Sveinssonar (f. 1946, d. 1968) laganema og Helgu Kjaran (f. 1947) grunnskólakennara. Stjúpfaðir hans er Ólafur Sigurðsson verkfræðingur (f. 1946). Birgir heitir í höfuðið á móðurafa sínum Birgi Kjaran alþingismanni, sem einnig sat á þingi fyrir Sjálfstæðisflokkinn.

Kona Birgis er Ragnhildur Hjördís Lövdahl (f. 1. maí 1971) og eiga þau dæturnar Ernu (f. 29. mars 2003), Helgu Kjaran (f. 24. ágúst 2005) og Hildi (f. 14. janúar 2010).

Birgir varð stúdent frá Menntaskólanum í Reykjavík árið 1988 og lauk embættisprófi í lögfræði í árið 1996. Árið 1999 fékk hann leyfi til málflutnings fyrir héraðsdómi, en stundaði síðan framhaldsnám við King's College í Lundúnum 1999-2000. Á árunum 1988 til 1994 var hann blaðamaður á Morgunblaðinu í námshléum og samhliða námi, en hóf störf hjá Verslunarráði Íslands (síðar nefnt Viðskiptaráð Íslands) haustið 1995. Hann var lögfræðingur ráðsins 1996-1998, skrifstofustjóri 1998-1999 og aðstoðarframkvæmdastjóri 2000-2003. Vorið 2003 var hann í nokkra mánuði starfandi framkvæmdastjóri ráðsins.

Birgir tók frá unga aldri þátt í félagsstarfi og hefur gegnt ýmsum trúnaðarstöðum. Í Menntaskólanum í Reykjavík var hann t.d. formaður beggja nemendafélaganna - forseti Framtíðarinnar 1985-1986 og inspector scholae 1987-1988. Hann var auk þess í sigurliði MR í Spurningakeppni framhaldsskólanna árið 1988. Eftir stúdentspróf hafa félagsmálastörf hans fyrst og fremst tengst stjórnmálum á hægri vængnum. Hann var formaður Heimdallar, félags ungra sjálfstæðismanna í Reykjavík, 1989-1991 og í stjórn Sambands ungra sjálfstæðismanna 1991-1993 og 1995-1997. Á háskólaárunum sat hann í stjórn Vöku og sat auk þess í Stúdentaráði Háskóla Íslands 1989-1991. Hann var stjórnarmaður í Varðbergi, félagi ungra áhugamanna um vestræna samvinnu, 1993-1998, og gegndi síðan formennsku í félaginu 1998-2000. Birgir sat um nokkurra ára skeið í umhverfismálaráði Reykjavíkur og var fulltrúi Reykjavíkurborgar í skólanefndum Menntaskólans í Reykjavík og Fjölbrautaskólans við Ármúla. Þá var hann í stjórn fulltrúaráðs sjálfstæðisfélaganna í Reykjavík tvívegis um tveggja ára skeið auk þess sem hann var kjörinn af landsfundi í miðstjórn Sjálfstæðisflokksins í tíu ár, frá 1993 til 2003. Hann hefur verið í stjórn ICEPRO, nefndar um rafræn viðskipti, fyrst 1998-1999 og aftur frá 2002, í stjórn EAN á Íslandi 2003-2004 og í stjórn Fjárfestingarstofu 2003-2005.

Vorið 2003 var Birgir kjörinn á Alþingi. Hann var 6. varaforseti þingsins 2003-2005 en 3. varaforseti frá 2005. Hann hefur setið í allsherjarnefnd og efnahags- og viðskiptanefnd frá 2003 og í kjörbréfanefnd og sérnefnd um stjórnarskrármál frá 2005. Hann var formaður allsherjarnefndar 2007-2009, formaður Íslandsdeildar Vestnorræna ráðsins 2003-2005 og formaður Vestnorræna ráðsins 2004–2005 og var formaður Íslandsdeildar Evrópuráðsþingsins 2005-2009. Í Þingvallanefnd 2013–2017. Í stjórnarskrárnefnd skipaðri af forsætisráðherra 2005–2007 og 2013–2016. 2. varaforseti Alþingis 2016–2017 og formaður þingflokks sjálfstæðismanna síðan 2017. Árið 2021 var Birgir kosinn forseti alþingis.

Nefndasetu á Alþingi og trúnaðarstörfum á vegum þingsins hefur að öðru leyti verið svo háttað: Allsherjarnefnd 2003–2013 (formaður 2007–2009), efnahags- og viðskiptanefnd 2003–2007, kjörbréfanefnd 2005–2011, 2013 og 2016–, sérnefnd um stjórnarskrármál 2005–2007 (formaður 2006–2007), 2009 (fyrri), 2009 (seinni), viðskiptanefnd 2007–2009, umhverfisnefnd 2009–2011, saksóknarnefnd 2010–2012, þingskapanefnd 2011–2013 og 2013–2016, stjórnskipunar- og eftirlitsnefnd 2011–2013 og 2015–2016, umhverfis- og samgöngunefnd 2011–2013 og 2013–2016, utanríkismálanefnd 2013–2015 (formaður) og 2017, velferðarnefnd 2017, allsherjar- og menntamálanefnd 2017–.

Íslandsdeild Vestnorræna þingmannaráðsins 2003–2005 (formaður), Íslandsdeild Evrópuráðsþingsins 2005–2007 (formaður), Íslandsdeild VES-þingsins 2007–2009, Íslandsdeild NATO-þingsins 2013–2016, Íslandsdeild Alþjóðaþingmannasambandsins 2017–.

Tenglar[breyta | breyta frumkóða]


Fyrirrennari:
Steingrímur J. Sigfússon
Forseti Alþingis
(2021 –)
Eftirmaður:
Enn í embætti