Bahá'í trúin

Úr Wikipediu, frjálsa alfræðiritinu
(Tilvísað frá Bahá'í)
Stökkva á: flakk, leita
Heimsmiðstöð bahá'í trúarinnar í Haifa í Ísrael
Tilbeiðsluhús bahá'í trúarinnar í Nýju Delí á Indlandi, oft kallað lótusmusterið.

Bahá'í trúin eru ung trúarbrögð stofnuð á 19. öld í Persíu (nú Íran) af Mírzá Husayn 'Alí (1817-1892) sem síðar fékk titilinn Bahá'u'lláh (Dýrð Guðs). Fylgjendur bahá'í trúarinnar eru kallaðir bahá'íar. Þeir eru um sex milljónir í yfir tvöhundruð löndum. Bahá’í trúin er, frá landfræðilegu sjónarmiði, talin næst útbreiddasta trú heims á eftir kristni.

Bahá'í ritin tala um það að öll helstu trúabrögð heims séu frá Guði komin og tala gjarnan um „stighækkandi opinberun“. Þetta hugtak er oft útskýrt með skólagöngu. Skólinn er aðeins einn en kennararnir margir. Mannkynið þroskast stig af stigi og þarf því alltaf á nýjum kennara að halda til að leiðbeina því á andlegri og félagslegri þroskagöngu þess í samræmi við þarfir þess og aðstæður hverju sinni. Þeir sem Búddha talaði til á sínum tíma þurftu á öðrum boðskap að halda en þeir sem Múhameð talaði til mörg hundruð árum seinna. Nokkrir af þessum miklu fræðurum og andlegum leiðtogum mannkynsins voru Abraham, Krishna, Móses, Saraþústra, Búddha, Kristur og Múhammeð. Bahá’íar líta á Bahá’u’lláh sem nýjasta fræðarann í þessari röð og telja hann kominn með boðskap fyrir mannkynið á tímum einingar og gífurlegra breytinga á högum þess. Bahá’í ritin segja að Guð muni halda áfram að senda mönnunum boðbera sína meðan mannkynið lifir á jörðunni.

Aðalatriði kenninga bahá'í trúarinnar eru að Guð sé einn, trúabrögðin séu af einni og sömu rót og mannkynið sé eitt. Iðkun bahá'í trúarinnar fer einkum fram á heimilum trúaðra eða öðrum samkomustöðum sem samfélög bahá'ía nota. Sjö tilbeiðsluhús bahá'ía hafa verið reist, eitt í hverri heimsálfu, og þrjú til viðbótar eru á áætlun. Þau hafa öll níu dyr sem tákn um einingu þeirra níu heimstrúarbragða sem eru þekkt í sögu mannkynsins. Heimsmiðstöð bahá'í trúarinnar er í Haifa í Ísrael og þar er aðsetur æðstu stjórnar trúarinnar sem og helgistaðir hennar. Þó búa engir bahá'íar í Ísrael í dag nema tímabundið í tengslum við Heimsmiðstöðina.

Tenglar[breyta]