Akureyrarveikin
Akureyrarveikin (fræðiheiti Akureyri disease eða morbus Akureyriensis) er smitsjúkdómur í flokki ME sjúkdóma (myalgic encephalomyelitis) eða síþreytufárs en það eru sjúkdómar sem lýsa sér með verkjum í vöðvum eða beinverkjum samfara hita og einkennum frá heila og/eða mænu.
Fyrsta tilfelli Akureyrarveikinnar var greint árið 1948 en þá gekk yfir faraldur á Akureyri og veiktust 465 manns eða 7 % af íbúum Akureyrar. Veikin breiddist út og stök tilvik af Akureyrarveiki komu upp um allt land. Faraldrar gengu á Þórshöfn og á Patreksfirði árin 1953 og 1955. Engin tilvik hafa verið greind frá árinu 1955.
Akureyrarveikin lýsti sér með sótthita,bein- og liðverkjum og vöðvasærindum en einnig særindum í hálsi og óþægindum í meltingarvegi, höfuðverk og stífleika á hálslið, streitu og kvíða og máttleysi og dofa í hluta líkamans.
Aðeins 15 % þeirra sem veiktust náðu fullum bata. Flestir náðu allgóðum bata en um 25% þeirra sem veiktust jöfnuðu sig aldrei og hafa alla ævi verið þreyttir bæði andlega og líkamlega og nánast allir fengið vefjagigt sem svo hefur aukið á þreytuna. Afbrigði af Parkinson sjúkdómi er algengara meðal þeirra sem veiktust af Akureyrarveikinni en ætla mætti og er það talið vera afleiðing heilabólgu sem var hluti veikinnar.
