AFL Starfsgreinafélag

Úr Wikipediu, frjálsa alfræðiritinu
Sjá aðgreiningarsíðuna fyrir yfirlit yfir aðrar merkingar „Afl“
Merki AFL Starfsgreinafélags

AFL Starfsgreinafélag (AFL) er stærsta stéttarfélag á Austurlandi. Félagið varð til 28. apríl 2007 með sameiningu þessara félaga: AFL Starfsgreinafélag Austurlands, Verkalýðsfélag Reyðarfjarðar og Vökull Stéttarfélag.

AFL Starfsgreinafélag er þriðja fjölmennasta verkalýðsfélag landsins í dag — á eftir Eflingu og VR. Stærð félagsins skýrist af víðtækum sameiningum verkalýðsfélaga á Austurlandi síðustu ár og miklum uppgangi í atvinnulífi í fjórðungnum.

Yfirlit[breyta | breyta frumkóða]

Félagssvæðið er víðfeðmt, en það nær frá Langanesbyggð í norðri til Skeiðarársands í suðri. Ríflega 9000 félagsmenn eru í félaginu í 4 deildum, verkamannadeild, sjómannadeild, iðnaðarmannadeild og deild verslunar-og skrifstofufólks.

Félagið á aðild að Starfsgreinasambandinu, Sjómannasambandinu, Samiðn og Landssambandi íslenskra verslunarmanna, auk aðildar að Alþýðusambandi Íslands. Félagið tekur virkan þátt í starfi sambandanna og ýmissa annarra félaga og sjóða. Félagið á til dæmis stjórnarmenn í framkvæmdastjórn Starfsgreinasambandins, Sjómannasambandsins og Samiðnar, í stjórn Landsmenntar, Lífeyrissjóðsins Stapa, Sameinaða lífeyrissjóðsins, Þekkingarnets Austurlands og Vaxtarsamnings Austurlands. Félagið hafði auk þess forgöngu um stofnun Starfsendurhæfingar Austurlands, sem tók til starfa í janúar 2008 og sinnti endurhæfingu um 30 einstaklinga á fyrstu starfsönn. Forstöðumaður StarfA er Erla Jónsdóttir.

Þá hefur félagið tekið þátt í alþjóðlegu starfi, m.a. verið þátttakandi í Leonardo verkefni með IF Metall í Svíþjóð og átt þátt í stofnun ALCOA Workers Global Network, sem er óformlegur hópur verkalýðsfélaga sem í er launafólk, starfandi í ALCOA verksmiðjum.

Þjónusta og starfssemi[breyta | breyta frumkóða]

Starfssemi AFLs eins og flestra annarra stéttarfélaga skiptist í innra starf og síðan þjónustu við félagsmenn.

Innra starf félagsins fer aðallega fram í gegnum starf með trúnaðarmönnum félagsins[1], stjórnum og ráðum félagsins og öflugu námskeiðshaldi fyrir félagsmenn og trúnaðarmenn þess. Helstu viðburðir innra starfs félagsins eru fyrir utan félagsfundi og deildarfundi, árlegur fundur trúnaðarmanna sem stendur í tvo daga. Á þeim fundum hefur verið lagður grunnur að stefnumótunarvinnu félagsins.

Félagið heldur úti öflugri þjónustu fyrir félagsmenn. Í því sambandi má meðal annars nefna að haldið er úti skrifstofum á öllum þéttbýlisstöðum á Austurlandi. Leitast er við að tryggja félagsmönnum sem bestan og greiðastan aðgang að upplýsingum og þjónustu á heimasíðunni.

Þjónusta félagsins skiptist í nokkra flokka:

  1. Almenn þjónusta / upplýsingar fyrir félagsmenn er varða launa og kjaramál.
  2. Lögfræðiaðstoð við félagsmenn vegna innheimtu launa og annarra kjaratengdra mála.
  3. Gerð kjarasamninga - heildarkjarasamninga eða sérsamninga og vinnustaðasamninga.
  4. Starfsemi Orlofssjóðs félagsins er á og rekur á fjórða tug orlofshúsa og íbúða.
  5. Starfsemi Sjúkrasjóðs félagsins er greiðir félagsmönnum dagpeninga í veikindum og ýmis konar styrki til heilsueflingar og forvarna.
  6. Starf að sí-og endurmenntun. Umsjón og afgreiðsla endurmenntunarsjóðsstyrkja og sjóða.

Saga AFLS[breyta | breyta frumkóða]

AFL Starfsgreinafélag var stofnað 28. apríl 2007, með sameiningu þriggja félaga, AFLs Starfsgreinafélags Austurlands, Verkalýðsfélags Reyðarfjarðar og Vökuls Stéttarfélags. Öll félögin sem sameinuðust í AFLi eiga sér langa sögu:

Afl Starfsgreinafélag Austurlands[breyta | breyta frumkóða]

AFL - Starfsgreinafélag Austurlands var stofnað þann 14. janúar 2001 þegar, sex verkalýðsfélög á svæðinu frá Bakkafirði til Fáskrúðsfjarðar voru sameinuð. Utan við þessa sameiningu var eitt félag á áður nefndu svæði, en það er Verkalýðsfélag Reyðarfjarðar sem stofnað 1. apríl 1933. Félögin sem sameinuðust voru: Verkalýðs- og sjómannafélag Fáskrúðsfjarðar, Verkamannafélagið Árvakur á Eskifirði, Verkalýðsfélag Norðfirðinga, Verkalýðsfélag Fljótsdalshéraðs og Borgarfjarðar, Verkamannafélagið Fram á Seyðisfirði, Verkalýðs- og sjómannafélag Vopnafjarðar og Skeggjastaðahrepps. Með sameiningunni varð til stærsta stéttarfélag á Austurlandi.

Verkalýðsfélag Reyðarfjarðar[breyta | breyta frumkóða]

Verkalýðsfélag Reyðarfjarðar var eitt af elstu starfandi verkalýðsfélögum landsins, tæplega 100 ára gamalt. Til undirbúningsfundar var boðað milli jóla og nýárs árið 1907. „Að kvöldi þess 29. desember 1907 var fundur haldinn í bindindisfélagshúsinu til að ræða um stofnun verkamannafélags í Reyðarfjarðarhreppi. Á fundinum voru mættir 16 menn“, segir í fyrstu fundargerð félagsins. Á þessum fundi voru lagðar fram tillögur um nafn félagsins og árstillag. Fimm manna nefnd var kjörin til að semja lög og reglur félagsins. Verkamenn á Reyðarfirði fóru strax í undirbúningsvinnu og sunnudaginn 19. janúar var stofnfundurinn haldinn.

Vökull Stéttarfélag[breyta | breyta frumkóða]

Vökull Stéttarfélag varð til þann 31. október 1999, þegar Verkalýðs- og sjómannafélag Stöðvarfjarðar, Verkalýðs- og sjómannafélag Breiðdælinga, Verkalýðs- og sjómannafélag Djúpavogs og Verkalýðsfélagið Jökull á Hornafirði voru sameinuð.

Hugmyndir um sameiningu félaga innan Alþýðusambands Austurlands höfðu af og til stungið upp kollinum og um miðjan 10. áratuginn kom fram tillaga á þingi Alþýðusambands Austurlands um að sameina öll félögin á Austurlandi í eitt félag. Þótti mörgum tillagan víðáttuvitlaus á þeim tíma.

Stjórn AFLs Starfsgreinafélags 2008 - 2009[breyta | breyta frumkóða]

  • Hjördís Þóra Sigurþórsdóttir, Höfn, formaður
  • Sigurður Hólm Freysson, Eskifirði, varaformaður
  • Sævar Örn Arngrímsson, Eskifjörður Formaður iðnaðarmannadeildar
  • Grétar Ólafsson, Vopnafirði, formaður Sjómannadeildar
  • Jóna Járnbrá Jónsdóttir, Neskaupstað, formaður verkamannadeildar
  • Gunnhildur Imsland, Höfn, formaður verslunarmannadeildar
  • Þröstur Bjarnason, Reyðarfirði, gjaldkeri
  • Eyþór Guðmundsson, Egilsstöðum, meðstjórnandi
  • Reynir Arnórsson, Djúpavogi, meðstjórnandi
  • Stefanía Stefánsdóttir, Seyðisfirði, meðstjórnandi
  • Kristján Magnússon, Vopnafirði, ritari
  • Kristrún Hallgrímsdóttir, Stöðvarfirði, varamaður í aðalstjórn
  • Hanna Ingólfsdóttir, Breiðdalsvík, varamaður í aðalstjórn
  • Þorkell Kolbeins, Höfn Varamaður í aðalstjórn
  • Sara Guðfinna Jakobsdóttir, Stöðvarfirði, varamaður í aðalstjórn

Framkvæmdastjóri AFLs Starfsgreinafélags er Sverrir Albertsson

Neðanmálsgreinar[breyta | breyta frumkóða]

  1. „listi yfir trúnaðarmenn“. Afrit af upprunalegu geymt þann 12. september 2018. Sótt 30. desember 2020.

Heimild[breyta | breyta frumkóða]