Aðventukrans
Úr Wikipediu, frjálsa alfræðiritinu
Aðventukrans er krans, oftast gerður úr grenigreinum með fjögur kerti (aðventukerti), sem komið er fyrir á hring (krans) eða í röð og oftast skreytt með barrgreinum. Kertin eru fyrir hvern sunnudag í aðventunni og kveikt er á þeim á þeim dögum þannig að fyrsta sunnudag í aðventu er kveikt á fyrsta kertinu, annan sunnudag í aðventu á fyrsta og öðru kertinu o.s.frv. Aðventukransar eru algengir í kristnum löndum bæði í kirkjum og á heimilum. Hugsanlega hafa þeir verið til allt frá því á miðöldum en nútímaaðventukransar hafa breiðst út frá Þýskalandi frá því seint á 19. öld. Í Austurkirkjunni eru stundum notaðir aðventukransar með sex kertum þar sem aðventan hjá þeim er lengri en í Vesturkirkjunni.
