1621-1630
Úr Wikipediu, frjálsa alfræðiritinu
| Ár: |
| 1621 - 1622 - 1623 - 1624 - 1625 1626 - 1627 - 1628 - 1629 - 1630 |
| Áratugir: |
| 1591-1600 - 1601-1610 - 1611-1620 1621-1630 - 1631-1640 - 1641-1650 1651-1660 - 1661-1670 - 1671-1680 1681-1690 - 1691-1700 - 1701-1710 |
| Aldir: |
| 16. öldin - 17. öldin - 18. öldin |
| Fædd - Dáin |
1621-1630 var þriðji áratugur 17. aldar sem telst til árnýaldar í sögu Evrópu.
[breyta] Atburðir og aldarfar
[breyta] Þrjátíu ára stríðið
Eftir sigur í orrustunni við Hvítafjall virtust Habsborgarar ósigrandi í Þrjátíu ára stríðinu. Hersveitir Spánarkonungs sóttu fram í Niðurlöndum og þegar Kristján 4. Danakonungur hugðist láta til sín taka fyrir hönd mótmælenda var hann gjörsigraður af hersveitum keisarans undir stjórn Tillys og Wallensteins og hrökklaðist yfir á Sjáland við illan leik. Keisaraherinn rak flóttann og rændi og ruplaði á Jótlandi. Við lok áratugarins stigu svo Svíar fram á völlinn með vel þjálfaðan her sem sneri stríðsgæfunni mótmælendum í vil.
[breyta] Frönsku trúarbragðastríðin
Þau réttindi sem franskir húgenottar höfðu fengið með Nantes-tilskipuninni í valdatíð Hinriks 4. urðu óðum að engu í stjórnartíð Loðvíks 13. sem gerði hvað hann gat til að draga úr áhrifum tilskipunarinnar. Þetta leiddi til uppreisnar í La Rochelle og umsáturs undir stjórn nýs æðstaráðs, Richelieu kardinála, sem lyktaði með ósigri húgenotta þrátt fyrir aðstoð frá Englandi.
[breyta] Tilraun til einveldis í Englandi
Í Englandi var grunnurinn lagður að Ensku borgarastyrjöldinni þegar Karl 1. tók við af föður sínum, Jakobi 1. Karl ætlaðist til konungshollustu af þinginu og áleit sig hafa sjálfstætt vald, líkt og faðir hans hafði gert. Hann hafði líka áhuga á að láta til sín taka í styrjöldunum á meginlandinu en enska þingið stóð í vegi fyrir þeim fyrirætlunum. Hann leysti þá upp þingið en neyddist til að kalla það saman aftur og skrifa undir réttindaskjal, því ella hefði hann ekki getað innheimt skatt.
[breyta] Landnám í Nýja heiminum
Sókn evrópskra landnema til Nýja heimsins hélt áfram, stöðugt fjölgaði í þeim nýlendum sem fyrir voru og nýjar nýlendur voru stofnaðar, eins og Portsmouth (New Hampshire), Salem, Nýja Amsterdam, Barbados og Sankti Kristófer og Nevis. Alkonkvínar reyndu að losa sig við þær nýlendur sem reistar höfðu verið í Virginíu með því að ráðast á Jamestown, en höfðu ekki erindi sem erfiði.
[breyta] Sjórán
Hollenskir og enskir sjóræningjar höfðu sig mikið í frammi gegn spænskum og portúgölskum skipum og nýlendum. Á Íslandi bar það við að herskip frá Barbaríinu, undir stjórn hollensks ræningjaforingja, drápu og rændu fólki í Grindavík og Vestmannaeyjum sem þeir seldu síðan í þrældóm í Algeirsborg.
